Andlitslyfting án skurðaðgerðar

Húðþétting með Ultraformer III

Andlitslyfting án skurðaðgerðar með Ultraformer III er vinsæl meðferð til að yngja upp húðina á hálsinum og á bringunni, þar sem aðrar meðferðir hafa ekki verið að gefa nógu góðan árangur. Slöpp húð á maga eftir þyngdartap eða meðgöngu er einnig vinsælt svæði ásamt lærum og hnésvæði.

Ultraformer III – húðþéttingarmeðferð

Meðhöndlun með Ultraformer III fyrir andlitið er best lýst sem „mini“ andlitslyftingu án skurðaðgerðar.

Ultraformer meðferðin örvar endurnýjun húðarinnar, hún fær aukinn teygjanleika og verður unglegri. Meðferðin gengur út á það að hljóðbylgjur fara niður í dýpstu lög húðarinnar og hita vefinn. Við það örvast endurnýjun og kollagen framleiðsla húðarinnar. Húðin þéttist töluvert og þar af leiðandi fæst sjáanleg lyfting á því svæði sem meðhöndlað er. Þess vegna er þessi meðferð oft kölluð andlitslyfting án skurðaðgerðar. Munurinn á þessari meðferð og öðrum, t.d. picolaser, er að hljóðbylgjurnar komast dýpra ofan í húðina og þess vegna verður meiri húðþétting en með öðrum meðferðum. Aukin kollagenframleiðsla hefst í raun strax eftir meðferðina en fullur árangur næst 3-5 mánuðum eftir meðferð.

Hver meðferð tekur um 30-90 mínútur, fer eftir því hvaða svæði er meðhöndlað.

Húðþétting á líkama

Þegar að líkaminn er meðhöndlaður er notuð enn meiri orka en í andlitið ásamt því að hljóðbylgjurnar fara dýpra eða alveg niður í fitulagið. Hér hefur því meðferðin ekki einungis húðþéttingaráhrif heldur fitueyðingar áhrif einnig þar sem fitufrumurnar eru viðkvæmar fyrir hita. Ef mikill fituvefur er til staðar á meðferðarsvæðinu og ósk viðkomandi að eyða fitunni og þétta húðina þá mælum við alltaf með fitufrystingu fyrir húðþéttinguna, eða um það bil 4-6 vikum áður. Fitufrystingin er mun áhrifaríkari meðferð til að eyða fitu en þéttir ekkert húðina. Því passa þessar tvær meðferðir mjög vel saman.

Fyrir hvern er Ultraformer III?

Fyrir alla þá sem vilja fá meiri þéttingu í húðina. Meðferðin hentar aftur á móti ekki öllum, sér í lagi þeim sem eru með eftirfarandi frábendingar:

● Opin sár eða bólga í húð eins og þrymlabólur á meðferðarsvæðinu
● Ígrædd lækningatæki eins og gangráður eða bjargráður
● Ígræðslur úr málmi á meðferðarsvæðinu
● Ekki er óhætt að meðhöndla yfir ígrædda brjóstapúða
● Ekki er óhætt að meðhöndla á svæði þar sem eru upphækkuð ör (ofholdgun) eða keloid ör
● Ekki er óhætt að meðhöndla yfir svæði sem hafa verið meðhöndluð með fylliefnum nýlega, mælt með að bíða í 1 ár
● Meðganga eða brjóstagjöf
● Blóðþynning

Hvernig virkar Ultraformer III?

Ultraformer er byggð á HIFU (High Intensity Focused Ultrasound) og MMFU (Micro Macro Focused Ultrasound) tækni og er eina tækið á markaðnum í dag sem gerir það. Flest sambærileg tæki eru einungis byggð á HIFU.

Hvaða líkamssvæði er hægt að meðhöndla?

Það er í rauninni hægt að meðhöndla flest svæði á líkamanum en þau vinsælustu eru allt andlitið eða einungis hlutar af andliti eins og augnsvæðið (Brow lift) og kjálkar. Einnig er þessi meðferð mjög vinsæl meðferð til að yngja upp húðina á hálsinum og á bringunni, þar sem aðrar meðferðir hafa ekki verið að gefa nógu góðan árangur. Slöpp húð á maga eftir þyngdartap eða meðgöngu er einnig vinsælt svæði ásamt lærum og hnésvæði.

HVAÐ GERIST EFTIR MEÐFERÐINA?

Það sést yfirleitt mjög lítið á húðinni eftir meðferðina og þú getur í rauninni snúið aftur til vinnu eða að þínu daglega lífi strax eftir meðferðina. Sumir upplifa örlítið mar og eymsli á meðferðarsvæðinu eftir meðferðina og kannski dofa en þetta lagast yfirleitt mjög fljótt, frá nokkrum klukkustundum til örfárra daga.

ER MEÐFERÐIN SÁRSAUKAFULL?

Það er mjög mismunandi hve mikinn sársauka einstaklingar upplifa við meðferðina. Flestum finnst þetta ekki sársaukafull meðferð, aðeins vægur sársauki en svo eru alltaf einhverjir sem finna meiri sársauka. Til að upplifa sem minnst óþægindi þá mælum við með því að taka inn 1g af parasetamóli 30 mínútum fyrir meðferðina.

HVE LENGI VARIR ÁRANGURINN?

Sumir sjá árangur strax eftir meðferðina. Varanleg áhrif koma aftur á móti með tímanum þar sem það tekur bandvefsfrumur húðarinnar langan tíma að taka við sér og byrja að mynda nýtt kollagen. Það getur tekið allt frá 4 til 6 mánuðum. Ef meðferðin er einungis hugsuð í fyrirbyggjandi skyni þar sem slappleiki húðarinnar er mjög vægur dugar ein meðferð en ef það vantar mikið upp á þéttleika húðarinnar við fjögurra mánuða eftirskoðunina þá mælum við með tveimur meðferðum. Til að viðhalda árangri mælum við svo með einni meðhöndlun á hverju ári.

HVE LENGI TEKUR MEÐFERÐIN?

Fer eftir hvaða svæði er meðhöndlað, en getur verið frá 30-90 mínútur. Andlit og háls taka yfirleitt um 45-60 mínútur.

ER ÞETTA ÖRUGG MEÐFERÐ?

Það hafa verið framkvæmdar yfir 200.000 meðferðir með Ultraformer í heiminum í dag án nokkurra alvarlegra aukaverkana.

ERU EINHVERJAR AUKAVERKANIR?

Það getur komið vægur roði og bjúgur á meðferðarsvæðið strax eftir meðferðina, jafnvel smá dofi og eymsli. Yfirleitt horfið innan nokkurra klukkutíma. Þessi einkenni gefa til kynna að meðferðin er byrjuð að virka með því að valda örlitlum hitaskaða í húðinni og að viðgerðarferlið sé byrjað. Sumir geta fengið vægt mar, sérstaklega á viðkvæmum svæðum eins og við munnvik. Það tekur um viku að hverfa.

HVAÐ ÞARF MARGAR MEÐFERÐIR TIL AÐ NÁ ÁRANGRI?

Flestir sem eru með vægan slappleika í húðini þurfa einungis eina meðferð. Við metum það við eftirskoðun fjórum mánuðum eftir meðferðina hvort þörf sé á annarri meðferð. Þá er veittur 50% afsláttur af seinni meðferðinni. Athugið að það á einungis við það meðferðarsvæði sem var meðhöndlað, ekki önnur meðferðarsvæði. Við mælum svo með viðhaldsmeðferð einu sinni á ári. Eldri einstaklingar svara verr meðferðinni og gætu þurft fleiri meðferðarskipti.

ÞARF ÉG AÐ HUGA AÐ EINHVERJU FYRIR MEÐFERÐINA?

Ef þú tekur inn lýsi eða omega, íbúfen, naproxen eða önnur bólgueyðandi (NSAID) lyf þá mælum við með að hætta inntöku þeirra viku áður til að minnka líkur á mari.