Háreyðing
Það er eðlilegt að vera með hárvöxt á líkamanum. Hversu mikill hann er og hvar fer eftir erfðum, kyni, hormónaójafnvægi, aldri og ákveðin lyf geta einnig valdið auknum hárvexti.
![Hudlaeknastodin 24 04 17 00023 Resize 1](/media/sqfb0ih2/hudlaeknastodin-24-04-17-00023-resize-1.png?width=352&height=352&v=1dab126a0c1a5d0&format=webp)
Ef hárvöxturinn er á svæðum þar sem hans er ekki óskað fer fólk oftast í að fjarlægja hárin. Margir plokka, raka eða vaxa, sem getur oft ert húðina og aukið verulega inngróin hár ásamt því að árangurinn er afar skammvinnur. Einnig geta þessar aðferðir valdið því að viðkomandi fær á tilfinninguna að hárvöxturinn aukist og að hárin verði grófari.
Háreyðing með laser er frábær kostur fyrir þá sem vilja losna við óæskileg hár.
Í einföldu máli er lasermeðferð meðferð með ljósi af ólíkum bylgjulengdum, en bylgjulengdin ræður því hve langt ljósið nær niður í húðina. Geislinn beinist sérstaklega gegn dökka litarefninu í hárinu, hitar það alveg niður í hársekkinn og eyðileggur þannig hársekkinn endanlega.
Fyrir hverja henta háreyðingarlaser?
Meðferðin hentar ef fjarlægja á óæskilegan hárvöxt á líkama, t.d. í andliti, á bíkinisvæðinu, fótleggjum, handarkrikum og baki.
Það er mikilvægt að hafa í huga að mjög ljós hár, hvít eða grá, svara ekki meðferðinni þar sem það verður að vera litarefni til staðar til að eyðileggja hársekkinn. Því grófari og dekkri hár og því ljósari húð, því betri og skjótari er árangurinn. Ástæðan er að því meira litarefni sem er til staðar í hárinu því meiri hiti leiðist niður í hársekkinn.
Hverjir eru kostir og gallar háreyðingar með laser?
Mikilvægt er að hafa í huga að háreyðingarmeðferð krefst endurtekninga til að ná tilætluðum árangri. Hár gengur í gegnum mismunandi vaxtarskeið og meðferðin virkar best þegar hárin eru í vaxtarfasa. Á hverjum tíma er um 20% háranna í þeim fasa. Þess vegna þarf að meðhöndla hvert svæði í nokkur skipti. Það er nokkuð einstaklingsbundið hve margar meðferðir þarf og einnig getur verið munur á milli húðsvæða. Í andliti líða bara nokkrar vikur á milli vaxtarfasa á meðan það geta liðið nokkrir mánuðir á milli á fótleggjum. Þess vegna er æskilegt að láta líða að minnsta kosti 1-2 mánuði á milli meðferða.
Hvað ber að hafa í huga fyrir meðferðina?
Raka þarf svæðið sem á að meðhöndla sama dag eða daginn áður. Það er í lagi að raka á milli meðferða en ekki fara í vax.
Ekki má nota brúnkukrem að minnsta kosti 2 vikum fyrir meðferð.
Hvernig fer meðferðin fram?
Svæðið sem á að meðhöndla er kælt með kælipokum. Síðan er meðferðarhausinn lagður á húðina og skoti hleypt af. Flestir upplifa skotið eins og skammvinna hitatilfinningu í húðinni. Þegar skotinu er hleypt af má sjá ljósglampa líkt og þegar teknar eru myndir með flassi. Fjöldi skota fer eftir stærð svæðis sem verið er að meðhöndla. Meðferðin er sársaukalítil, það kemur smá stingur í hverju skoti en laserinn inniheldur einnig innbyggðan kælibúnað sem hjálpar til við að kæla og vernda húðina á meðan á meðferð stendur og minnkar það líka óþægindin.
Hvað þarf að koma mörg skipti?
Það fer eftir hárvexti viðkomandi og einnig líkamssvæði hvað þarf mörg skipti. Það getur verið mjög einstaklingsbundið og því ómögulegt að segja til um það fyrr en liðið er á meðferðartímann.
Við hverju má búast eftir meðferðina?
Strax efir meðferðina kemur smávegis roði fram, líkt og við vægan sólbruna. Einstaka sinnum vottar fyrir bjúg á meðferðarsvæðinu. Þessi einkenni ganga venjulega yfir á 30 mínútum til 24 klst. Ef sviði er í húðinni má bera kælipoka við húðina eða bera kalt gel, t.d. Aloe Vera, á húðina.
Það er mikilvægt að vernda meðferðarsvæðið frá sólinni 1-2 vikur fyrir og eftir meðferð. Einnig ber að forðast bað, heita potta, sund eða líkamsrækt þar sem búast má við að svitna mikið 24 klst.
Ekki er að vænta árangurs strax eftir meðferðina, heldur líða yfirleitt 1-2 vikur þar til fer að draga úr hárvexti. Í byrjun meðferðar má búast við því að hárvöxtur aukist örlítið aftur rétt fyrir næstu meðferð. Þetta má ekki túlka sem svo að meðferðin hafi misheppnast, heldur eru hár sem verið hafa í hvíldarfasa að flytjast í vaxtarfasa og verða því sýnilegri.