Húðþétting með Ultraformer MPT

Ultraformer MPT er vinsæl meðferð til að yngja upp húðina í andliti, á hálsinum og á bringunni, þar sem aðrar meðferðir hafa ekki verið að gefa nógu góðan árangur. Einnig er í vissum tilfellum hægt að meðhöndla slappa húð á maga eftir þyngdartap eða meðgöngu, sem og læri og hnésvæði.

Ultraformer MPT – Húðþéttingameðferð

Ultraformer meðferðin örvar endurnýjun húðarinnar, hún fær aukinn teygjanleika og verður unglegri. Meðferðin gengur út á það að hljóðbylgjur fara niður í dýpstu lög húðarinnar og hita vefinn. Við það örvast endurnýjun og kollagen framleiðsla húðarinnar. Húðin þéttist töluvert og þar af leiðandi fæst sjáanleg lyfting á því svæði sem meðhöndlað er. Munurinn á þessari meðferð og öðrum, t.d. picolaser, er að hljóðbylgjurnar komast dýpra ofan í húðina og þess vegna verður meiri húðþétting en með öðrum meðferðum. Aukin kollagenframleiðsla hefst strax eftir meðferðina en fullur árangur næst 3-5 mánuðum eftir meðferð.

Húðþétting - ljómi og lyfting

Ljómi og lyfting er meðferð með Ultrafromer MPT sem er sérsniðin fyrir allt andlitið en með áherslu á neðri hluta andlits. Notast er við nýja tækni til að móta, lyfta og skerpa kjálkalínu og neðri hluta andlits.

Meðferðin felur í sér notkun 7 gerða af hýalúrónsýrum, 10 fjölpeptíð, níasínamíð og PDRN — sem er leitt djúpt inn í húðina með MPT-handstykkinu til að styðja við raka og bæta ásýnd húðarinnar. Meðferðin stuðlar að kollagenörvun og húðþéttingu.

Meðferðin hentar best:

Fyrir þá sem sýna fyrstu merki öldrunar og eru með væga húðslökun.
Fyrir þá sem vilja skerpa kjálkalínu og slétta ásýnd neðri hluta andlits.
Fyrir þá sem vilja auka ljóma og lífga upp á húðina.

Ljómi og lyfting er einnig frábær leið til að viðhalda árangri af húðþéttingu.

Hvernig virkar Ultraformer MPT?

Ultraformer er byggð á HIFU (High Intensity Focused Ultrasound) og MMFU (Micro Macro Focused Ultrasound) tækni og er eina tækið á markaðnum í dag sem gerir það. Flest sambærileg tæki eru einungis byggð á HIFU.

Hvaða líkamssvæði er hægt að meðhöndla?

Það er í rauninni hægt að meðhöndla flest svæði á líkamanum en þau vinsælustu eru allt andlitið eða einungis hlutar af andliti eins og augnsvæðið (brow lift) og kjálkar. Einnig er þessi meðferð mjög vinsæl meðferð til að þétta húðina á hálsinum og á bringunni, þar sem aðrar meðferðir hafa ekki gefið nógu góðan árangur.

Hvað gerist eftir meðferðina?

Það sést yfirleitt mjög lítið á húðinni eftir meðferðina og þú getur í rauninni snúið aftur til vinnu eða að þínu daglega lífi strax eftir meðferðina. Sumir upplifa örlítið mar og eymsli á meðferðarsvæðinu eftir meðferðina og mögulega dofa en þetta lagast yfirleitt mjög fljótt, frá nokkrum klukkustundum til örfárra daga.

Er meðferðin sársaukafull?

Það er mjög mismunandi hve mikinn sársauka einstaklingar upplifa við meðferðina. Flestum finnst þetta ekki sársaukafull meðferð en svo eru alltaf einhverjir sem finna meiri sársauka. Til að upplifa sem minnst óþægindi þá mælum við með því að taka inn 1g af parasetamóli 30 mínútum fyrir meðferðina.

Hve lengi varir árangurinn?

Sumir sjá árangur strax eftir meðferðina. Varanleg áhrif koma aftur á móti með tímanum þar sem það tekur bandvefsfrumur húðarinnar langan tíma að taka við sér og byrja að mynda nýtt kollagen. Það getur tekið allt frá 4 til 6 mánuðum. Ef meðferðin er einungis hugsuð í fyrirbyggjandi skyni þar sem slappleiki húðarinnar er mjög vægur dugar ein meðferð en ef það vantar mikið upp á þéttleika húðarinnar við fjögurra mánuða eftirskoðunina þá mælum við með tveimur meðferðum. Til að viðhalda árangri mælum við svo með einni meðhöndlun á hverju ári, sumum dugar annað hvert ár. Eldri einstaklingar svara meðferðinni verr og gætu þurft fleiri meðferðarskipti.

Hversu langan tíma tekur meðferðin?

Meðferðin tekur 30-120 mínútur allt eftir því hvaða svæði er meðhöndlað.

Er þetta örugg meðferð?

Það hafa verið framkvæmdar yfir milljón meðferðir með Ultraformer í heiminum í dag án nokkurra alvarlegra aukaverkana.

Eru einhverjar aukaverkanir?

Það getur komið vægur roði og bjúgur á meðferðarsvæðið strax eftir meðferðina, jafnvel smá dofi og eymsli. Þetta er yfirleitt horfið innan nokkurra klukkutíma, þó getur verið vægur bjúgur í nokkra daga. Þessi einkenni gefa til kynna að meðferðin sé byrjuð að virka með því að valda örlitlum hitaskaða í húðinni og að viðgerðarferlið sé hafið. Sumir geta fengið mar, sérstaklega á viðkvæmum svæðum eins og við munnvik. Það tekur um viku að hverfa.

Hvað þarf margar meðferðir?

Flestir sem eru með vægan slappleika í húðinni þurfa einungis eina meðferð. Hjá þeim sem eru með meiri slappleika er það metið við eftirskoðun fjórum mánuðum eftir meðferðina hvort þörf sé á annarri meðferð. Við mælum svo með viðhaldsmeðferð fyrri alla einu sinni á ári. Eldri einstaklingar svara verr meðferðinni og gætu þurft fleiri meðferðarskipti.

Fyrir hvern er Ultraformer MPT?

Fyrir alla þá sem vilja fá meiri þéttingu í húðina. Meðferðin hentar aftur á móti ekki öllum, sér í lagi þeim sem eru með eftirfarandi frábendingar:

Opin sár eða bólga í húð eins og þrymlabólur á meðferðarsvæðinu.
Sár eða bólga er á meðferðarsvæðinu eins og til dæmis frunsa, sýking eða annað.
Forðast skal sólböð, ljósabekki og brúnkukrem viku fyrir meðferð.
Ígrædd lækningatæki eins og gangráður eða bjargráður.
Ígræðslur úr málmi á meðferðarsvæðinu.
Ekki er óhætt að meðhöndla yfir ígrædda brjóstapúða.
Ekki er óhætt að meðhöndla á svæði þar sem eru upphækkuð ör (ofholdgun) eða keloid ör.
Meðganga eða brjóstagjöf.
Blóðþynning.
Ekki er óhætt að meðhöndla yfir svæði sem hafa verið meðhöndluð með fylliefnum nýlega, mælt með að bíða í 4 vikur.
Forðast skal aðrar húðmeðferðir tveim vikum fyrir áætlaðan tíma í húðþéttingu.

Ef þú tekur inn lýsi eða omega, íbúfen, naproxen eða önnur bólgueyðandi (NSAID) lyf þá mælum við með að hætta inntöku þeirra viku fyrir meðferðina til að minnka líkur á mari.

Fyrir meðferð með Ultraformer MPT

Hægt er að meðhöndla nánast öll svæði líkamans.
Gott getur verið að taka 1 g af parasetamóli 30 mínútum fyrir meðferðina því sumir upplifa óþægindi við meðferðina.
Ef þú tekur inn lýsi eða omega, íbúfen, naproxen eða önnur bólgueyðandi (NSAID) lyf þá mælum við með að hætta inntöku þeirra viku áður til að minnka líkur á mari.
Afbókaðu tímann ef þú ert með virkan áblástur (frunsu) og bíddu þar til einkennin eru gengin yfir.

Eftir meðferð með Ultraformer MPT

Sumir upplifa örlítinn roða, mar, eymsli eða bólgur á meðferðarsvæðinu, stundum dofa en þetta lagast fljótt, frá nokkrum klukkustundum til nokkurra daga.
Ekki er mælt með hreyfingu í sólarhring
Ekki skal fara í heitt bað eða gufu í 5-7 daga eftir meðferð.
Ekki skal drekka áfengi í amk 4 daga eftir meðferð.
Forðist að nudda svæðið í að minnsta kosti viku.
Notið milt rakakrem og sólarvörn (hærri en SPF 50) daglega.