Djúpur Erbium laser er mjög öflugur “ablative” laser sem tekur í rauninni ysta lagið af húðinni þannig að ný húð myndast á yfirborðinu með færri hrukkum og línum, meiri þéttleika og færri litabreytingum. Djúpur Erbium laser og CO2 laser eru öflugustu lasermeðferðirnar sem eru til í dag, engin önnur meðferð örvar eins mikið nýmyndun kollagens og elastíns í húðinni. En hver er munurinn á Erbium og CO2 laser? Batatíminn er um helmingi minni eftir djúpan Erbium laser miðað við CO2 laser þar sem það verður ekki eins mikill brunaskaði á vefjum í kringum lasergeislann. Helstu aukaverkanir eru bólga, roði og mar sem geta varið í viku. Árangurinn er einstaklingsbundinn en varir yfirleitt í 2-3 ár. 

Djúp Erbium lasermeðferð felur í sér að gerð eru örsmá göt á yfirborð húðarinnar. Þetta virkjar gróandaferli líkamans sem endurnýjar efsta lag húðarinnar ásamt því að örva kollagenmyndun í dýpri lögum hennar.  Þessi meðferð er mjög áhrifarík til að draga úr dýpri hrukkum og fínum línum. Dregur einnig úr örum eftir bólur og  brúnum blettum í andliti. Þar að auki gerir meðferðin húðina stinnari. 

Hægt er að skipta lasermeðferðum til að endurnýja húðina í tvennt; ablatífar og non-ablatífar meðferðir: 

Ablatívar lasermeðferðir geta gefið frábæran árangur eftir aðeins eina meðferð en húðin tekur 1-2 vikur að jafna sig. Non-ablatívar lasermeðferðir geta gefið mjög góðan árangur, sem er þó ekki eins áberandi. Til að ná hámarksáhrifum þarf oftast 2-3 meðferðir. Húðin jafnar sig hins vegar mjög fljótt og ekki þarf að vera frá vinnu. 

Ablatívur laser er mun áhrifaríkari þegar kemur að djúpum hrukkum, sólskaðaðri húð og  lausri og þunnri húð í andliti (crepey skin).  

Í kjölfar meðferðar má búast við færri og grynnri hrukkum, jafnari húðtón, sléttari áferð og þéttari húð. Því dýpra sem meðhöndlað er með lasernum má búast við áhrifaríkari meðferð en um leið  tekur húðin lengri tíma að jafna sig. 

Búast má við flögnun og roða fyrstu dagana eftir meðferð  Þetta gengur yfir á u.þ.b 10-14 dögum.  Full áhrif koma fram á þremur til sex mánuðumt þegar að nýmyndum kollagens er að fullu komin fram. Fyrstu áhrif má þó sjá strax eftir 2 vikur þegar húðin hefur jafnað sig að mestu. 

Öllum er ráðlagt að taka fyrirbyggjandi frunsutöflur (valaciclovir) fyrir meðferð. Til að koma í veg fyrir litabreytingar í húð þá þarf að forðast sól tveimur vikum fyrir meðferð og í fjórar vikur á eftir.  

Fyrir meðferð er sett staðdeyfikrem á meðferðarsvæðið til að draga úr óþægindum. Meðferðin sjálf tekur 30-60 mín eftir stærð meðferðarsvæðis. Krem er sett á eftir meðferð og gefnar ráðleggingar um eftirmeðferð heima. 

Búast má við að vera nokkra daga frá vinnu. Hversu lengi húðin er að jafna sig fer eftir hversu djúpt er meðhöndlað. Strax eftir  meðferðina verður húðin rauð og bólgin. Búast má við kláða og jafnvel blöðrum. Fyrst um sinn má búast við eymslum í húð. Í nokkra daga á eftir mun þér líða eins og þú sért sólbrunnin. Húðin getur vessað og síðan geta myndast sárskorpur og flögnun. 

Flögnunin gengur yfir á u.þ.b. viku. Húðin getur verið í bleikari kantinum í þó nokkrar vikur, sérstaklega ef maður er með ljósa húð í grunninn. Mikilvægt er að nota sólarvörn (50 spf) til að vernda húðina.

Eftir ablatíva lasermeðferð má gera ráð fyrir að vera frá vinnu í 5-7 daga. 

Öllum er ráðlagt að taka fyrirbyggjandi frunsulyf fyrir meðferð þar sem líkur á frunsu aukast eftir ablatíva lasermeðferð.  

Líkur á litabreytingum í húð eftir ablatíva lasemeðferð aukast eftir dekkri húðtýpum.